Personanan kapasitá i profeshonal ta esensial pa e desaroyo di deporte

Na kabamentu di aña 2015, FDDK a laga hasi un investigashon tokante deporte i moveshon físiko tantu rekreativo komo kompetitivo aki na Kòrsou. E resultado a redundá den rekomendashonnan ku lo mester implementá pa promové e desaroyo di deporte riba diferente tereno, segun e karakterístikanan, kondishonnan spesífiko, nesesidatnan agudo i oportunidatnan ku nos tin aki na Kòrsou. Un di e puntonan ku a sali na kla inmediatamente ta e echo ku profeshonalnan pa guia deporte ta di suma importansia. Kòrsou su nivel pa guia deporte ta defisiente.

 

Investigashon

Kuater profeshonal di “Instituto Nacional de Deportes, Educación Física y Recreación” (INDER) di Cuba, kua ta spesialisá den deporte deporte rekreativo, deporte kompetitivo i nivel tòp i edukashon físiko, a keda instruí pa hasi e investigashon aki na nòmber di FDDK.  Diferente métodonan manera opservashon, entrevista, seshonnan di breinstòrm ku skolnan i field, analisis di dokumentonan i swot analisis a wòrdu uzá pa yega na e rekomendashonnan. E rekomendashonnan aki ta forma e base pa futuro ku FDDK mester mehorá deporte dor di duna un empuhe pa medio di programa- i aktividatnan ku lo stimulá e desaroyo di deporte i kontribuí na un mihó bienestar, prevenshon di kriminalidat, prevenshon di obesidat i kalidat di bida di nos komunidat.

 

Balor di profeshonalnan den deporte

Profeshonalnan den deporte ta esensial pa e desaroyo di deporte mundial, esaki  lógikamente ta konta pa Kòrsou tambe. Nan ta e personanan ku ta karga un estudio riba diferente nivel te ku universitario ku lo promové, optimalisá i strukturá deporte pa nos komunidat.

 

FDDK ya a kuminsá tuma e pasonan nesesario pa asina ekspandé i mehorá deporte na Kòrsou en general. E lo ta sigur un desafio, pero si tur instansia traha huntu i kolaborá,  nos lo logra profeshonalisá nos deporte. FDDK for di aña 2015 a kuminsá den ocho(8) skol di fundeshi ku un proyekto piloto(foto) ku e grupo aki ku a studia deporte pa 4 aña largu na nivel di MBO. FDDK a logra kristalisá e finansiamentu pa e proyekto ariba menshoná ku Fundashon Bon Intenshon, SOAW & OWCS. Alabes FDDK ta preparando pa bini ku kurso di rekapasitashon pa tantu dosente di edukashon físiko nivel akadémiko i tambe nivel MBO pa duna un base pedagógiko deportivo. Esaki ku e meta pa kumpli ku e nesesidat ku tin pa moveshon físiko pa hubentut den kuríkulo eskolar. Tambe p’asina profeshonalisá e ramo di edukashon deportivo ku pa sigur último 20 aña no tabatin atenshon den enseñansa básiko i avansá.

 

Keda pendiente pa e siguiente relato di análisis di nos struktura deportivo.