Tur kos ta kla pa nos fakansi ku deporte

Un di e aktividatnan mas grandi i mas gustá di FDDK ta su fakansiplan anual. Den pasado e aktividat aki tabata tuma lugá durante di 9 dia repartí den tres siman den luna di yüli i ta hasi uso di hinter e kompleho deportivo Sentro Deportivo Kòrsou, SDK. Na 2015, a registrá kasi 21.000 partisipante!

E aña aki, pa motibunan ya konosí, nos a haña nos ta kòrta den e dianan di fakansiplan di 9 pa 6 dia, kuanan ta 19, 20, 21, 26, 27 i 28 di yüli di 9’or di mainta pa 1’or di mèrdia.

E dianan aki lo ta kargá ku entretenimentu pa nos muchanan, inkluyendo facepainting, bouncers, hopi disiplina di deporte i pa promé biaha, un sekshon di gòlf, boogschieten, hindernisbaan, ninichi i tambe outo di remote control. Djabièrnè último gerensia i personal a tèst e sekshon nobo aki pa tin sigur ku tur kos ta funshoná manera mester ta, i mas aún, ta kumpli ku reglanan di seguridat pa nos muchanan.

FDDK ta gradisí su partnernan, Gobièrnu di Kòrsou, Chippie, MCB i Refineria Isla, pa yuda hasi e magno evento aki posibel, i ta warda nos muchanan di 6 pa 16 aña for di djamars awor 9’or di mainta pa disfrutá di fakansi ku deporte!

Riba e página di Facebook, por haña mas detaye di e fakansi plan.