Hensley Paulina ta sostené “1Mion pa un mihó SDK”

Hensley Paulina ta un di nos yunan di tera ku ta profilando internashonalmente den atletismo bou di bandera hulandes. Resientemente e tambe a forma parti di e tim hulandes ku a partisipá na Rio2016.

Djasabra último Hensley a yega Kòrsou spesialmente pa forma parti di e mega proyekto “1Mion pa un mihó SDK”. Manera a bin ta informá pa algun dia kaba, e evento aki lo ta djasabra awor di 8or di mainta pa 8or di anochi i lo ta kargá ku entretenimentu pa grandi i chikí. Banda di eventonan deportivo ku lo tin, lo tin tambe entretenimentu musikal, entretenimentu pa nos muchanan dor di ‘A Special Day’ i tambe posibilidat pa interkambiá ku varios atleta ku lo ta presente.

Kòrda ku karga di tur kunuku ta yena Punda, pues kada depchi ta mas ku bon biní. Pues djasabra, ta spera komunidat kompleto na Sentro Deportivo Kòrsou.