ACU Deporte Eskolar 2016-2017 a ranka sali ofisialmente

Pa di dos aña konsekutivo ACU ta e partner ofisial di e programa deportivo pa nos studiantenan di tantu skol básiko komo avansá organisá dor di FDDK, kua mirando e sosten di ACU, ta karga e nòmber di ACU Deporte Eskolar.

Kompetensianan di deporte eskolar a bin ta tuma lugá ya pa hopi aña. FDDK pa medio di e programa aki ta duna oportunidat pa skolnan kompetí ku otro den e diferente disiplinanan deportivo, manera, futsal, vòlibòl i basketbòl i deportenan individual, tènis di mesa, dam, ahedres, natashon, atletismo i futbòl amerikano. Ta finalisá e programa deportivo eskolar aki ku un kompetensia interinsular entre Aruba, Boneiru, Kòrsou i tambe St. Maarten.

Meta di e programa eskolar deportivo aki ta pa motivá praktikamentu di deporte bou di mucha- i hóbennan, loke ta bon tantu pa nan salú físiko komo intelektual. Ta probá ku muchanan ku ta ehersé un òf mas deporte tin sierto grado haltu di disiplina i sentido di responsabilidat den nan otro tareanan diario.

Djamars 25 di òktober, a ranka sali ofisialmente ku vòlibòl den Sala Niels Liberia na Stadion di Suffisant. A kuminsá tambe ku futsal, mientras ku proksimamente lo sigui ku basketbòl.

Pa keda na altura di tur akontesimentu den kuadro di ACU Deporte Eskolar, sigui e página di Facebook, www.facebook.com/DeporteEskolar.