AJB awor na Openbare AGO
E proyekto ‘Alleen jij bepaalt wie je bent/Ami, mi mes i mi logronan’ a kuminsá na Kòrsou na sèptèmber 2014 dunando hóbennan e oportunidat pa praktiká deporte tra’i mèrdia na skol mes, unabes nan terminá nan debernan eskolar. E tremendo proyekto aki a bira posibel riba inisiativa di Ministerio di Hustisia di Kòrsou i Ministerio di Siguridat i Hustisia Hulandes.
‘Alleen jij bepaalt wie je bent’ a kuminsá ku 60 hóben serka di e organisashon di beisbòl Santa Maria Pirates bou di e nòmber ‘Ami, mi mes i mi logronan’ i a keda kompletá di forma éksitoso despues di e promé temporada. For di un inventarisashon hasí riba desaroyo di komportashon i prestashon na skol di e partisipantenan di VSBO Juan Pablo Duarte a keda konkluí ku di e 60 partisipantenan un total di 52 di nan a demostrá un desaroyo sumamente positivo.
E bon resultadonan optené a pone ku e proyekto ‘Ami, mi mes i mi logronan’ por a kontinuá i wòrdu ampliá; a yega na un total di 180 partisipante pa e temporada di 2015-2016.
Na òktober 2015 a kuminsá tambe ku 20 hóben praktikando e deporte di basketbòl na VSBO St Jozef bou di guia di Montaña Spartans/FDDK pa e temporada di 2015-2016, kua tambe a keda alargá pa temporada 2016-2017. A inisiá tambe ku futbòl na Vesta, unda 20 hóben di diferente skol nivel di VSBO a keda selektá pa partisipá na e promé temporada.
Mirando e éksito di e proyekto, a kuminsá ku ‘Alleen Jij Bepaalt wie je bent’ awor na Openbare AGO na Montaña, unda 20 hoben mas ta haña e oportunidat pa praktiká e deporte di basketbòl. Ayera djamars 27 di sèptèmber, a tuma lugá e inisio ofisial di e proyekto aki dor di minister di hustisia sr. Nelson Navarro.
Nos ta spera di por keda konta ku sosten di entre otro ministerio di hustisia pa sigui ku e proyekto aki, dunando mas hóben e oportunidat pa krea un mentalidat positivo, ku un kurpa sano i tambe ta e bon ehèmpel den nos komunidat.
Sorry, the comment form is closed at this time.