FDDK ta bai ehekutá deporte komo medio di prevenshon kontra kriminalidat

Entrante ougùstùs próksimo un grupo di alumno (22) di enseñansa di fundeshi lo kuminsá haña guia èkstra den deporte i rekreo, medio pa kombatí kriminalidat di un forma preventivo. Preparashon i ehekushon di e proyekto lo ta na enkargo di Fundashon Desaroyo Deportivo Kòrsou.

FDDK a risibí un suma total di 1.1 mion florin for di Ministerio di Hustisia, pa ta mas eksakto for di e Fondo pa Kriminalidat pa e proyekto spesífiko aki. E proyekto ta enserá ku 12 skol di enseñansa di fundeshi, ku no ta hañando moveshon físiko, lo kuminsá haña deporte i rekreashon den oranan di mainta. Di tur e alumnonan, lo skohe un kantidat ku lo forma parti di e proyekto ku ta enserá ku e muchanan aki lo bai keda skol den oranan di mèrdia i risibí guia den un ramo di deporte. Banda di risibí e preparashon pa desaroyá nan talento, lo dediká atenshon spesial pa e muchanan aki siña disiplina, desaroyá otro kualidatnan importante den nan formashon.

Na aña 2015 FDDK a entregá e petishon di e proyekto aki na minister di hustisia di tempu ei, sr. Nelson Navarro, i esaki a ser aprobá pa un aña, ku posibilidat di keda alargá pa dos aña mas. E suma ku a risibí aworaki ta kubri un aña. FDDK ta perkurá pa ‘begeleider’ i un asistente na kada skol, kendenan lo sòru pa e muchanan aki haña unifòrm, i dos bes pa siman un almuerso bon balansá, i naturalmente guia den deporte. Den e organisashon ta apuntá un kordinadó pa henter e proyekto, loke ku tin un vakatura p’e na e momentunan aki.

E proyekto aki ta similar na e proyekto “Alleen Jij Bepaalt Wie Je Bent” ku tin aktualmente den ehekushon na VSBO St. Jozef i tambe AGO Montaña, proyekto ku ta dirigí riba hobennan di 12 pa 18 aña di skolnan sekundario. Esun aki lo ta dirigí riba hobennan di skolnan di fundeshi bou di e nomber “ Ami I mi Futuro”  komo ku ta hustamente na e etapa aki e problemanan ta kuminsá serka nos hobennan. Riba e foto por mira entrega di cheque dor di Senora Lai I tambe Naisha St. Jago e persona enkarga ku e skibi e proyekto” Ami I mi Futuro” .

FDDK ta sumamante kontentu ku e sosten risibí di tantu eks-minister Navarro, komo aktual minister Girigorie pa e proyektonan menshoná por a bira realidat. Ámbos tin e vishon ku deporte ta un vehíkulo importantísimo pa yuda kombatí kriminalidat riba nos isla i tabatin oïdo pa e petishonnan di FDDK, pa huntu kristalisá e proyektonan. Esaki un biaha mas ta mustra ku skibi proyekto i bon dokumentashon por logra traha huntu ku otro ministerio tantu di OWCS i Hustisia uzando deporte komo medio.