KAP, kampion femenino skol avansá den vòlibòl ACU Deporte Eskolar

Pa di dos aña konsekutivo ACU ta e partner ofisial di e programa deportivo pa nos studiantenan di tantu skol básiko komo avansá organisá dor di FDDK, kua mirando e sosten di ACU, ta karga e nòmber di ACU Deporte Eskolar.

FDDK pa medio di e kompetenshanan eskolar aki ta duna oportunidat pa skolnan kompetí ku otro den e diferente disiplinanan deportivo, manera, futsal, vòlibòl i basketbòl i deportenan individual, tènis di mesa, dam, ahedres, natashon, atletismo i futbòl amerikano. Ta finalisá e programa deportivo eskolar aki ku un kompetensia interinsular entre Aruba, Boneiru, Kòrsou i tambe St. Maarten.

Meta di e programa eskolar deportivo aki ta pa motivá praktikamentu di deporte bou di mucha- i hóbennan, loke ta bon tantu pa nan salú físiko komo intelektual. Ta probá ku muchanan ku ta ehersé un òf mas deporte tin sierto grado haltu di disiplina i sentido di responsabilidat den nan otro tareanan diario.

Djabièrnè último a tuma lugá e wega final di vòlibòl pa nos hobennan femenino di skol avansá, unda ku Kolegio Alejandro Paula, KAP, a bai ku e título máksimo mientras ku International School of Curaçao, ISC, a keda na di dos lugá. Konsekuentemente, nos hobennan di KAP ta esnan ku lo representá Kòrsou na weganan interinsular na St. Maarten fin di mart próksimo. E hoben Anais Conradus a resultá e MVP.

E siman aki lo tin final di vòlibòl maskulino i tambe di futsal skol avansá!