Kòrsou ku resultadonan positivo den Weganan Interinsular 2016

Kampeonato Interinsular ta un kampeonato deportivo pa nos hobennan ku meta pa uni nos islanan, dunando nan e oportunidat di bishitá i eksperensiá deporte kompetitivo for di kas.

 

Na mart último, Kòrsou tabata anfitrion di hobennan for di Aruba, Bonèiru i St. Maarten, kendenan huntu ku Kòrsou a kompetí den basketbòl i vòlibòl. Den e disiplinanan aki St. Maarten a sali kampeon di Basketbòl, mientras ku Kòrsou, International School of Curaçao, tabata kampeon di vòlibòl. Den basketbòl skol di fundeshi Sta. Rosa de Lima a terminá na di dos lugá.

 

Despues a sigui na Aruba, unda ku nos muchanna di St. Jozef a terminá na di tres lugá pa loke ta futsal, mientras ku den atletismo nos a bari ku premio ganando no menos ku 9 medaya.

 

Fin di siman tras di lomba, tabata final di Weganan Interinsular 2016 na Bonaire. Aki Kolegio Mgr. Wim Ellis a sali kampeon den futbòl skol di fundeshi mucha muhé i Kolegio Erasmo a sali sub-kampeon den vòlibòl skol di fundeshi mucha muhé.

 

Deporte no ta solamente un bon manera pa rekreá i keda den bon kondishon so; tambe e ta evitá hobennan di ta riba kaya kaminda nan por wòrdu enfrentá ku entre otro kriminalidat. Nos tur huntu mester sigui sostené deporte pa asina halsa e nivel di nos deporte lokal en general i kontribuí na un mihó bienestar, prevenshon di kriminalidat, prevenshon di obesidat i kalidat di bida di nos komunidat.

 

No por keda sin remarká ku otro aña nos lo ta selebrando 25 aña di Weganan Interinsular era nobo!