Preparashonnan a kuminsá pa Fakansiplan 2017

Un di e aktividatnan mas grandi i mas gustá di FDDK, ta nos fakansiplan anual. E aktividat aki ta tuma lugá durante di 6 dia repartí den dos siman den luna di yüli i ta hasi uso di hinter e kompleho deportivo Sentro Deportivo Kòrsou, SDK. Aña pasá a konta ku un promedio di 2.300 bishitante pa dia!

 

Pa hopi hóben i mayornan ku no tin e finansa pa bai un fakansi den eksterior, e fakansiplan aki ta un bon opshon pa tòg disfrutá di algu positivo i distraí mente durante di fakansi.

Tras di hinter e aktividat aki tin un infrastruktura gigantesko. Tur e diferente skinanan di deporte mester wòrdu instalá i tambe mester prepará kos di kome i refresko pa e partisipantenan diariamente. Tambe mester limpia Sentro Deportivo Kòrsou tur dia pa esnan ku mester hasi uzo di dje despues di e fakansiplan i tambe mas ku klaro e siguiente dia.

 

Seguridat tambe ta un di e áreanan ku ta haña hopi atenshon. Na porta ta sòru pa semper tin bewaker ku ta kontrolá e personanan i tambe tira un bista riba e bestuario. Semper tin un ekipo di Rode Kruis presente por si akaso. E aktividat ta unu deportivo i ta spera tur bishitante bisti respetabel, preferibel apto pa hasi deporte, i apto, mirando ku e aktividat su grupo di enfoke ta hobennan di 6 pa 14 aña.

 

Peronal di FDDK ya ta den ful preparashon pa e mega evento aki, kua e aña aki lo ta dianan 11 pa 13 i 18 pa 20 di yüli próksimo di 9or di mainta pa 1or di mèrdia.

 

Kòrda ku pa keda na altura di tur desaroyo di FDDK, sigui www.facebook.com/DeporteKorsou