Ta intensivá kòntròl durante fakansiplan

Ya kaba awe nos a yega na e di 4 dia di e fakansiplan di FDDK, despues di 3 dia eksitoso unda a registrá kasi 7.000 bishitante.

Un di e areanan ku ta haña mas atenshon, ta esun di  seguridat. Ku un promedio di 2.200 bishitante pa dia i premirando ku e último dianan lo bai haña aun mas bishitante, lo intensivá e kòntròlnan prinsipalmente na entrada. E kòntròlnan aki ta dirigí tantu riba pertenensia komo bestuario.

Nos ke rekordá un i tur ku e fakansiplan ta pa e grupo di 6 pa 16 aña. Pa e muchanan mas chikí, nan mester ta kompañá pa un adulto. Esnan mas grandi, si kisas bo ta mustra mas grandi ku bo edat, sòru pa bo tin un identifikashon bálido ku bo. No ta pèrmití entrada na hobennan riba 16 aña!

Nos damitanan, bisti deportivo pero respetabel; no ta pèrmití entrada den kaso ku tin entre otro blusa chikí, barika afó, òf  shòrt demasiado kòrtiku. Dado kaso konstatá ku ora drenta bai kambia paña pa otro ku no ta kumpli ku reglanan tòg, loke a pasa siman pasá, lo por saka bo afó di e kompleho deportivo. Ta rekomendabel pa laga kosnan di balor na kas.

Mayornan, kòrda ku e aktividat ta kaba 1’or, pues buska bo yu(nan) na tempu. FDDK no ta para responsabel pa loke por pasa despues di 1or pafó di kuránan di Sentro Deportivo Kòrsou.

Ban tur huntu duna di nos pa pasa e último dianan di fakansi ku deporte ameno, disfrutando sanamentu i garantisando e kontinuashon di e plan di fakansi aki pa hopi aña mas.