Un mion pa un mihó SDK

Fundashon Desaroyo Deportivo Kòrsou (FDDK) ta uni forsa ku Curaçao Media Organization (CMO), varios artista i deportista di Kòrsou pa meta komun: rekoudá 1 mion florin pa un mihó Sentro Deportivo Kòrsou den 12 ora.

Djasabra 10 di sèptèmber próksimo, komo parti di selebrashon di Dia di Prensa, medionan di prensa lo paralisá Kòrsou i topa otro na Sentro Deportivo Kòrsou di 8’or di mainta te ku 8’or di anochi ku un meta komun: mobilisá komunidat pa rekoudá 1 mion florin pa realisá un plan spektakular i impreshonante pa ‘upgrade’ e fasilidatnan di SDK pa honra e tesoro deportivo di Kòrsou segun stándartnan internashonal pa medio di un desaroyo sostenibel i duradero.

Direktor di FDDK, Thakaidzwa Doran, a duna un bista di e situashon aktual di e establesementu i e plannan pa transformá e establesementu aktual den un pèrla pa e mundu deportivo, rekreativo i di entretenementu riba nivel internashonal. Segun e direktor di FDDK, “Kòrsou ta produsí atletanan grandioso ku ta kompetí i destaká kontinuamente riba esenario mundial. Esaki ta pone ku Kòrsou ta atraé aktividatnan kada bes mas grandi, pero aktualmente nos no por akapará esaki debidamente mirando e situashon aktual di e fasilidatnan.” Señor Doran ta sigui splika ku e tim di FDDK semper a apresiá ku miembronan di prensa pa basta tempu ta señalá e nesesidat di un renobashon kompleto di SDK. Entretantu e tim di FDDK ta sumamente orguyoso di por presentá na komunidat di Kòrsou i partikularmente e miembronan di prensa un plan ambisioso pero faktibel ku un vishon konkreto pa finalmente kuminsá traha pa desaroyá un mihó sentro deportivo pa Kòrsou.

 

Representante di e mas ku 500 miembronan di Curaçao Media Organization, e konosido periodista señora Valesca Díaz, ta sumamente entusiasmá ku e propósito èkstraordinario mará na e selebrashon di Dia di Prensa 2016. Valesca Diaz: “Nos tur ta konsiente di e situashon agudo di e edifisio i e fasilidatnan di SDK i miembronan di prensa ta orguyoso di por traha ku FDDK pa logra realisá e inisiativa akí. Loke nos logra awor lo benefisiá generashonnan aktual i di futuro.”

Ya e tim di FDDK ta preparando pa 12 ora yená ku diferente aktividat deportivo i sosial ku entretenementu durante henter e dia. Pueblo di Kòrsou ku aportá na e kousa lo por gana diferente premio i den kuadro di dia di prensa, partisipantenan aktivo afiliá na Curaçao Media Organization tin asta chèns pa gana un outo.

Fundashon Desaroyo Deportivo Kòrsou (FDDK) i Curaçao Media Organization (CMO) ta hasi un apelashon na nos tur ku ta fanátiko di desaroyo di Kòrsou pa forma parti di e dia spektakular akí. Hasi un donashon, maske kon chikí, pa yega na e montante pa inisiá e promé fase di e renobashon di Sentro Deportivo Kòrsou. Dia 10 di sèptèmber nos tur lo uni pa un meta komún i realisá e plan vishonario pa e Sentro Deportivo Kòrsou di futuro ku nos tur lo ta orguyoso di dje!